Муниципальное бюджетное дошкольное образовательное учреждение
Детский сад №2 «Кустук», с.Намцы,
МР «Намский улус», Республики Саха (Якутия)

Детский сад №2

https://kustuk.ou14.ru

Түөрт уон сыл оҕону иитиигэ
  • Автор: kustuk
  • Опубликовано: 13.06.2021
  • Просмотров: 2
  • Комментариев: нет

Нам селотун 2 №-дээх оҕо саадыгар 1976 сыл алтынньы 22 күнүгэр үлэлии киирбитим. Оччолорго Неустроева Анна Ефимовна сэбиэдиссэйдиир этэ. Оҕо саадыгар үлэбин оһох оттооччунан (истопник) саҕалаабытым. Ол саҕана детсааппыт сэттэ оһоҕунан оттуллар этэ.

Ол курдук, сэттэ оһоҕу оттон, маһын хайытан, олус элбэх үлэни көрсөн, ньиргиччи үлэлээбитинэн барбытым. Сарсыарда үлэм биэс чаастан саҕаланар этэ, оҕолор кэлиэхтэрин иннинэ оһохпун оттон сабарым, оҕолор кэлэллэригэр детсааппыт сылаас буоларын туһугар кыһаллар этим. Онтон үлэ чааһа бүтүүтэ, киэһэ, эмиэ оттуллар этэ, оһохторбун көрөн, сабан, киэһэ хойут дьиэбэр барар этим. 1976-1980 сс. оһох оттооччунан, рабочайынан үлэлээбитим.

1980 с. саҥа сэбиэдиссэйинэн Федорова Анна Степановна ананан үлэлии кэлбитэ. Анна Степановна миигин иитээччи көмөлөһөөччүтүнэн үлэҕэ көһөрбүтэ. Ол саҕана детсад 50 миэстэлээх этэ. Анна Степановна кэлэн үлэ күөстүү оргуйбута, сэттэ оһоҕу көтүттэрэн, саҥа котельнай туттарбыта. Детсааппытыгар ититии тардыллан, кочегардар үлэлээн саҕалаабыттара. 

Мин иитээччи көмөлөһөөччүтүнэн бэлэмнэнии бөлөххө, иитээччи Харитонова Мария Николаевналыын бииргэ үлэлээбиппит. Бөлөхпүтүгэр 30 оҕо сылдьар этэ. Иитээччини кытта тэҥҥэ сылдьан, барытын бииргэ оҥорон, көмөлөөн үлэлиир этибит. Араас бырааһынньыктарга детсааппытын киэргэтэн, симээн, киэһэ хойукка диэри сылдьарбыт.

1990 с. элбэх оҕобунан пенсияҕа тахсыбытым. Ол гынан баран, үлэбиттэн барбакка, поварынан үлэлээбитим. Повар үлэтэ олус эппиэтинэстээх. Туох баар кыһамньыбын ууран туран, оҕолору тотоойутук, минньигэстик аһатаары, сарсыарда эрдэ үлэм саҕаланар этэ. Повардыы сырыттахпына араас тэрээһиннэргэ бурдук ас буһаттараллара.

Общественнай тэрээһиннэргэ көхтөөхтүк кыттар этим. Ол саҕана тэрилтэлэр икки ардыларыгар араас элбэх тэрээһиннэр, фестивааллар буолаллара. Детсааппыт коллектива бары биир киһи курдук кыттарбыт. 

2008 сылтан 2017 сылга диэри таҥас сууйааччынан үлэлээн баран, бочуоттаах сынньалаҥҥа барбытым. Онон детсааппар 40 сыл үтүө суобастаахтык үлэлээбитим. Үлэлээбит сылларбын, коллективпын олус истиҥник саныыбын. Билигин даҕаны кыргыттарым умнубаттар, онтон олус үөрэбин уонна махтанабын. 

Билиҥҥи сэбиэдиссэй Сайдам Сайыыла Харысхан кыыһа куруук кэпсэтэ, билсэ-көрсө сылдьар. Түгэнинэн туһанан, детсаадым кыргыттарыгар, сэбиэдиссэйигэр Сайдам Сайыыла Харысхан кыыһыгар оҕо иитиитигэр-үөрэтиитигэр улахан кылаат киллэрэн, бу курдук үлэлии сылдьаргытыгар, үрдүк ситиһиини, дабайыыны баҕарабын.

Федора Васильева

Материал взят с сайта: энсиэли.рф

Accessibility